في جوانب كتير في التعليق الصوتي مهمة جدًا،
مينفعش نقول إن في حاجه أهم من حاجه، لإن ده بيخلق تخاذل أو إهمال في جانب بعينه
واهتمام بجانب تاني. لكن لازم أقول إن مضمون التعليق الصوتي هو الأداء أو التلوين
الصوتي. لإن نجاح الأداء بيخلق تأُثير في المتلقي/ المستمع وبالتالي بياخد خطوة
ناحية المحتوى المسموع وده تحديدًا وظيفة التعليق الصوتي.
تعالوا
كده نفتكّر تعريف التعليق الصوتي
التعليق الصوتي: هو استخدام الصوت بأداه لشرح محتوى ما.
ده معناه إن الأداء هنا مضمون التعليق الصوتي، وبالتالي كل العوامل ال " مهمة" اللي بنهتم بيها في التعليق الصوتي هي لدعم الأداء الصوتي. طب ما تيجي نعرف تعريف
الأداء الصوتي؟
الأداء الصوتي: هو فن نطق الكلام على صورة لكي تكشف القناع عن غموضه
ومعانيه.وهو فن التأثير في المستمع لكي ينجذب إلى الأداء ثم المحتوى بكل حواسه
السمعية ثم البصرية ثم الشعوريه.
ده معناه إن الأداء الصوتي أو التلوين
الصوتي الناجح دليل نجاحه الوحيد هو
التأثير في الجمهور المستمع بشكل إيجابي، ومش بس كده، لأ ده ياخد خطوة ناحية
المحتوى اللي بيسمعه، خاصًة لو بيسمع اعلان، لإن الغرض من الاعلان الترويج.
هنا يجي سؤال مهم: مما يتكون الأداء الصوتي؟
سؤال جميل، يلا نجاوب عليه.
مكونات الأداء الصوتي
بعيدًا عن المهارات المصاحبة للأداء الصوتي،
واللي بالضرورة لازم تكون موجودة في أي معلق صوتي زي: مخارج حروف سليمة، نطق
الكلمات بشكل سليم، لغة قوية ( أي أن كانت اللغة المستخدمه) تنظيم تنفس .. إلخ
فالأداء الصوتي له جانبين أو مكونين مهمين
جدًا:
1-مرونة الصوت
2-المشاعر
والجانبين دول متلازمين ومتشابكين جدًا.
يعني إيه؟
يعني فقد أحد المكونين هيسبب
الآتي:
- مفيش مشاعر هتظهر طول ما في رتابه في الصوت
أو ما يسمى بالمونوتون.
-الوقوع في التقليد هيخرّج المشاعر مفتعلة،
ومرونة الصوت مش صحيحه، وبالتالي الأداء كله هيكون مفتعل ومنفر.
-عدم القدرة على اكتشاف المشاعر الصحيحة
للمحتوى، هيخلي الأداء منفر بردو وهيبقى غير مقبول.
طيب، إيه هي الخطوات إللي هتساعد في تحسين
الأداء الصوتي؟
خطوات تحسين الأداء الصوتي
1-الاهتمام بتمارين استجلاب
المشاعر
استجلاب المشاعر من أكتر الحاجات الأساسية
والهامة في الاداء الصوتي، بعد ما تتعرف على مشاعر المحتوى بشكل صحيح. ده عن طريق
قراءة المحتوى وفهمه جدًا، م الآخر حط نفسك مكان الكاتب، واسأل نفسك، يقصد إيه؟ من
هنا هتعرف المشاعر الصحيحه ( حتى لو محتوى وثائقي).
الخطوة التانية هي إنك تستجلب المشاعر دي،
لازم يكون عندك قدرة على تمييز مشاعرك الحقيقية وفصلها عن مشاعر المحتوى وتنحيتها
جانبًا أثناء التسجيل بل وإظهار مشاعر المحتوى فقط.
طبعًا استجلاب المشاعر ليها تمارين كتيرة
جدًا. أحد أهم التمارين دي هي قراءة أي نص موجود بمشاعر مختلفة عنه، قراءته مرة
بمشاعر حب، فرح، حزن، غضب.. وهكذا.
2-مرّن وشك لمرونة الصوت
علشان تضمن صوت مرن ( دايمًا بقول لزملائي
المتدربين معايا، إن صوتك لازم يكون زي موج البحر) لازم تمرن وشك على المشاعر،
تعبيرات الوجه واليدين بتظهر على المشاعر والصوت. فا لو عايز صوتك فرحان جدًا،
ابتسم ابتسامة عريضة، ولو عايز صوت غاضب، اعمل حرف 7 أو8 بحواجبك...
ده أحد أهم أسرار مرونة الصوت واللي بتوضح قد
إيه هي متشابكة جدًا مع المشاعر.
3-تمارين الاعمار والأنواع
من أكتر التمارين المبهجة، إللي بتخليك تكتشف
مرونة صوتك أكتر وتظهرها، إنك تكتشف قدرتك التمثيلية، وتكتشف الأصوات جواك، اكتشاف
الأصوات بيخلّي صوتك مرن أكتر. لإن القدرة على استجلاب صوت طفل، طفلة، عجوز(رجل أو
امرأة) صوت أنثوي لو انت رجل والعكس صحيح، بيخليك تكتشف مساحات في صوتك وأصوات
عندك مكنتش تعرفها، وبالتالي ممكن تستخدمها مع إضفاء مشاعر عليها.
4-استخدام طبقات الصوت بشكل صحيح
طول الوقت بنتكلم عن طبقات الصوت، عندنا قرار
وقرار القرار، وجواب وجواب الجواب. طب استخدمهم إزاي؟
هو ده السؤال الصح، لإن طبقات الصوت هي أحد
الأدوات الهامة المساعدة لإظهار مرونة الصوت وإللي بتتفاعل مع المشاعر فا بتنجح
الأداء الصوتي.
طبقة الصوت المستخدمة في محتوى بنعرفها من
معنى المحتوى.
مثال: محتوى بيتكلم في حب الأم يعني المشاعر هنا حب هل لو اتكلمت من طبقة
القرار ( وهي الطبقة العريضة، الغامضة، العميقة في كل حد فينا) هيكون الكلام
مقبول؟ وهل تشبيكها مع مشاعر الحب هيكون منطقي؟ لا اعتقد..
وبالتالي الطبقة هنا لازم تكون خفيفه ودافئة،
أي طبقة أعلى من القرار، وبالتالي هنستخدم أول طبقات الجواب، هنا الصوت هياخد
مرونة بشكل أسهل وهيعبر عن المشاعر بطريقة طبيعية ناجحة.
وهنتكلم عن طبقات الصوت في مقال منفرد لإنه
موضوع هام جدًا وفيه مغالطات كتير.
5- سرعة الأداء ودرجة الصوت
من الحاجات إللي ناس كتير بتهملها وبتتعامل
معاها بإنها ملهاش لازمه، مع إنها من أهم عوامل إظهار المشاعر ومرونة الصوت أثناء
قراءة محتوى !
أيوة طبعًا، تحديد سرعة القراءة، ووقع
الكلمات من أهم العوامل إللي بتخلي أدائك ناجح. لازم مع أي محتوى قررت تقرأه كمعلق
صوتي تسأل نفسك: سرعة المحتوى ده إيه؟
وده بيظهر من فهمك لمعنى ومضمون المحتوى.
مثال: لو بتقرأ مقطع من رواية ملحمي درامي ( البطل مطارد) هنا أنت ممكن تكون سريع من الوصف، خاصًة لو
الوصف تفصيلي مثلًا. لكن لو كنت بطيء نسبيًا. الأداء هيقع والمستمع هيمل.
ونفس الشيء في درجة الصوت، في اداء يحتاج صوت
عالي، مع طبقة عاليه مع ابتسامه يبان صوت فرح جدًا. على العكس، في الأداء الحزين
بيحتاج صوت منخفض.
يبقى يجب مراعاة درجة الصوت.
كنت اتكلمت عن الجزئية دي وعن الأصوات إللي
عندنا في حلقة ساعة ستوديو، ممكن تسمعوها.
6-اطرد الخجل من صوتك
شايف كل إللي بنتكلم عنه ده؟ مش هيكون له أي
تأثير لو أنت بتخجل وبتتكسف من صوتك، أو من طريقة الأداء.
كتير مننا فعلًا عندهم مواهب قوية جدًا،
خاصًة في التمثيل الصوتي والدوبلاج، لكن شايفين إن ده شيء يخجلوا منه، لأنه بشكل
أو بآخر مثار سخرية، رغم إن الناس اللي بتسخر دي بتحب صوت هنيدي مثلًا لما عمل
كورتي البعبع !
على كُل، في حاجتين مهمين جدًا لازم تبتعد
عنهم لو عاوز تكون مُعلق صوتي صاحب أداء مميز.
-الخجل والكسوف من صوتك وطريقة
تعبيرك عنه قدام الناس.
-عدم الثقة في نفسك وموهبتك.
وبكده نكون وصلنا لنهاية المقال، اتمنى إن
الخطوات دي تكون مفيدة ليكم. هتكلم في مقالات تانية عن حاجات من اللي شاركتها
معاكم النهاردة بشكل مفصل أكتر.
تعليقات
إرسال تعليق