دايمًا بنلاحظ إن المعلقين الصوتيين
المحترفين ومدربي التعليق الصوتي بيتكلموا عن أهمية تنظيم التنفس والتحكم في خروج
ودخول النفس أثناء قراءة مقطع.
تعالوا نحلل السبب إللي بيخلي التنفس مهم
للكلام بشكل عام !
لما حد بيسألني ليه التنفس مهم ليا يعني
كمعلق صوتي، بقول إن ببساطة لو عرفنا مصطلح " الصوت" هنلاقيه إنه: هو
النغم الموسيقي الذي يخرج مع إندفاع الهواء من الجوف والحلق إلى الفم.
وعليه فإن الهواء مكوّن أساسي ( إن لم يكن
المكوّن الوحيد) في عملية خروج الصوت، وبالتالي أي حاجه ممكن تحصل في عملية التنفس
من خلل أو أي اعتلال هيحصل خلل في خروج الصوت، هيحصل خلل في ترتيب الكلام وطريقة
نطقه وكل حاجه بتبنيها في اللحظة دي علشان تتكلم هتتلخبط.
هقولكم مثال: لمّا بتكون واقف تتابع خناقة،
بتلاقي إن الشخص الغاضب تدافع الكلمات عنده أسرع، طبعًا في شروحات طبية للحالات
دي، لكن هتلاحظ إن " طريقة" أخذ النَفَس سريعة ومش بإنتظام ومع سرعة
ردود الأفعال، الهواء بيكون أقل، وهنا بتخرج الكلمات مكتومة ونهايات الكلمات/
الحروف مختفية!
المثال بيوضح إن نقص الهواء هو السبب. في
الوضع العادي وأنت تقرأ نصًا يحتاج أن يكون موصولًا، لازم يكون عندك مخزون من
الهواء. هتلاقوا مثال تاني وشرح تاني في التنفس في زمن الفويس اوفر.
يعني أنا محتاج يكون نفسي طويل بس؟
لأ، محتاج تنظم وتتحكم في تنفسك، وده علشان
تحقق معادلة هقولك عليها.
لكي تحقق أداء صوتي صحيح في كل أنواع التعليق الصوتي
مراعاة علامات الترقيم وأوامرها وحركاتها ينتُج عنها عمل سكتات
ونقلات في مرونة الصوت والمشاعر ووقفات فيخرج ويدخل الهواء بشكل
متزامن مع السكتات والوقفات
وبالتالي
أهم مكسب هتقدر توصل له من تنظيم عملية
التنفس والتحكم بها، هو إنك هتقدم أداء صوتي سليم، وهتقدر تستغل أوامر علامات
الترقيم صح، وتقف وتسكت وتعمل نقلات في مشاعر ( تغيير درجة الصوت، طبقة الصوت،
إمتداد للصوت، قطع .. إلخ) وكل ما تكون بتتحكم في تنفسك، كل ما تقدر تطوّل النفس
بالتمارين.
طيب افكرك
الاهميات والمكتسبات للتنفس السليم
في الغالب الاهميات والمكتسبات وجهان لعملة
واحدة
1-القضاء على التوتر والخوف
مهم نعرف إن التنفس السليم وتمارين التنفس
قادرين يقضوا على مشاعر القلق والتوتر والخوف، وده مهم ليك كمعلق صوتي، لإن كتير
جدًا بيكون مقلق قبل التسجيل ( خصوصًا بداخل استوديو احترافي) في تمرين خاص
بالجزئية دي هنشير ليه في الفقرة القادمة.
2-تقديم أداء محترف
زي ما قولت قبل كده، ببساطة أنت بتتنفس صح
يبقى هتقدر تتحرك بصوتك وتظهر مرونة صوتك ( زي ما بيقولوا للمطربين بيعمل عُرب)
والحقيقة إن الاداء المحترف أو الصحيح بيتحقق في جزئية التنفس بالتلات حاجات
تنظيم التنفس
التحكم في التنفس
تطويل النفس
أنت زي السبّاح، هل ينفع يقدم في بطولة وهو
نفسه قصير ومش قادر يتحكم فيه يخرج إمتى؟ طبعًا لأ.
3-سكتات ووقفات مظبوطة تخدم الأداء
زي ما قولنا في المعادلة، إن أوامر علامات
الترقيم مرتبطة بتنفذها كسكتات ووقفات ونقلات مشاعر وكل ده بشرط تحقيق تنظيم
والتحكم في التنفس.
لو مش هتقدر تتحكم في تنفسك يبقى مش هتعمل
السكته والوقفة في وقتها الصحيح، وهتستعجل علشان تاخد نفس، وبشكل كبير .. الاداء
هيقع وهيكون مُنفر جدًا.
4-تنظيم التنفس يجعلك متحكم في سرعة أدائك
كتير من المعلقين في بداية مشوارهم بيشتكوا
إنهم مش قادرين يقدموا تعليق سريع، وبيدوروا طول الوقت على حل.
الحل هو تنظيم التنفس !!
أيوة، تمارين تنظيم التنفس تقدر تساعدك جدًا،
وعملية تنظيم النفس وتوزيعه بشكل صحيح، هتخليك قادر تتحكم في سرعة الاداء وطبعًا
ده بيدعم تعليقك الصوتي لإن السرعة جزء مهم جدًا من اخراج التعليق الصوتي بشكل
صحيح.
5-التنفس من منطقة الحجاب الحاجز (التنفس بشكل صحيح)
أكيد سمعت الكلام ده قبل كده، بدون فذلكه،
كلنا بنتنفس من الرئتين، لكن في أسفل المعدة في منطقة تشبه الجيب تسمى الحجاب
الحاجز أو الديف رام.
المكان ده بيتم استغلاله علشان يكون جيب
للهواء، وبالتالي فهو يساعد على تطويل النفس، كمان المنطقة دي ليها مهمة دفع
الهواء للخارج، فلو الهواء خرج من المنطقة دي يخرج الصوت جهوري مثلًا، أو قوي
جدًا!
تمارين التنفس
تمرين ازالة التوتر والخوف
يتم فيها أخذ النفس من الانف بشكل عميق جدًا
حتى تشعر بعضلات البطن ترتفع للأعلى، ثم يتم اخراج الهواء من الانف أيضًا دفعة
واحدة.
تمرين تطويل النفس
يوخذ النفس من الأنف بعمق
يتم كتم النفس
يتم حساب المدة الزمنية التي حدثت خلال كتم
النفس
تمرين التحكم التنفس
يؤخذ النفس من الانف
يتم كتم النفس
يتم اخراج النفس بشكل تدريجي على دفعات
بطريقة اخراج جزء ثم التحكم في كتم المتبقي
وهكذا
تمرين تنظيم
التنفس
يؤخذ النفس من الانف بعمق ( اشعر بإمتداد
عضلات البطن مع النفس)
يكتم النفس بداخل الجسم
تقوم بإخراج النفس تدريجيا مع إصدار صوت (
آآآآآآآآه) من الفم
يقوم هذا التمرين على تنظيم التنفس والتحكم
في خروج الهواء بالتدريج
وبكده عرفنا أهمية التنفس لدى المعلق الصوتي،
وقد إيه تمارين التنفس هتحل مشاكل كتير.
في أسرار كتير هنقولها في مقالات ختلفة،
شاركونا الموضوعات والأراء وكل إللي تحبوا تعرفوه عن التعليق الصوتي.
تعليقات
إرسال تعليق