اعمل إيه علشان أكون معلق صوتي؟؟ أ.ب خطة موهبة التعليق الصوتي

 

 

المقال ده للناس إللي حاسه إنها تايهة، ومعندهمش أي علاقة أو صله بمجال التعليق الصوتي بشكل خاص، والإعلام أو الميديا أو التسويق ( الماركتينج) بشكل عام.. للناس إللي محالفهمش الحظ إن يكون ليهم علاقات تسهل عليهم خطوات كتير في مجال التعليق الصوتي.

وقبل ما ابدأ، حابه أقول إني زيي زي أي حد، لسه بيكافح، محققش حاجات كتير بيحلم بيها، عملت شغل وسعيت كتير، وكنت في يوم من الأيام الشخص الموهوب إللي ملوش علاقة بأي مجال قريب للتعليق الصوتي... الحقيقة أنا ماكنتش أعرف يعني إيه تعليق صوتي، ماكنتش أعرف إن فيه فن أو مجال عمل اسمه التعليق الصوتي. وعليه، أنت كموهوب عندك ميزة كبيرة .. إنك عارف.

 

المعرفة أول خطوة للإنتقال من موهوب بالفطرة إلى معلق صوتي

المعرفة المقصود بيها هنا هي المعلومات اللي عن مجال التعليق الصوتي، ماقصدش المعرفة التكنيكال والتدريب وهكذا. أقصد إنك لازم تكون مُلِم بكل ما هو فيه معلومات عن هذا المجال، تعريف التعليق الصوتي؟ مين الشخص اللي أطلق عليه كلمة معلق صوتي؟ قاريء الوثائقي؟ نشرة الأخبار؟ الاعلانات؟ الحكي واللي هو له أنواع كتيرة، أيهم فيهم يُطلق على مؤديه معلق صوتي؟ طب هل في مصطلحات بالعربية أو دارجه بالانجليزية المفروض اعرفها؟ مُعلق، مؤدي، حكّاي، راوي.. إلخ

طب إيه المجالات اللي بتحتاج مُعلق صوتي؟ الفن؟ الميديا؟ التسويق على السوشيال ميديا؟ إيه علاقتي بأي من المجالات دي؟ تجميع المعلومات دي، هينور عندك إجابات كتيرة، منها مثلًا إنك تحدد بشكل واضح نوع التعليق الصوتي، إللي إنت حاسس إن موهبتك فيه، أو إللي عايز تبدأ وتركز إن يجيلك فيه شغل.

خد بالك، تنمية المعرفة مش بتيجي بتركيز أسبوع قبل الإمتحان وقراءة كتيرة، ده احتكاك وإطلاع عالي جدًا، كل لما هتنمي معرفتك، 

كل لما طريقك هينور، وخطتك هتبقى محدده ومش تايه

نذاكر ونتدرب بقى؟

بُص، أنا هقولك أنا عملت إيه، زي ما قولت فوق أنا ماكنتش أعرف أي حاجه، وعلى العكس خطواتي كانت بطيئة، بس كُل لما كنت استكشف معلومة، كنت أدرّب قدامها، أو أذاكر حاجه قدامها، بعترف إن كان عندي جهل، وده مش عيب، العيب إني استمر فيه.

فا الصح، إنك تذاكر وتدّرب بالتزامن مع انك تعرف أكتر. كل لما تعرف معلومات عن المجال بشكل عام، وعن الحته اللي هترسم فيها خطه لصوتك بشكل خاص، كل لما تقرّب من الوصول الصح الحقيقي.

خليني أقولك مثال:

زمان، كان كل اللي حوليا بيقولوا إن صوتي إذاعي، وده دايمًا إللي كان في دماغي، إن صوت يعني إذاعة، لحد ما اكتشفت إن الصوت الإذاعي ده هو (اعلاني وعلى فكرة في فرق كبير من المذيع الإذاعي والمعلق الصوتي) فبدأت اقرأ عن: إيه هي الإعلانات؟ وطبعًا مع مرور الوقت والتطور والمعرفة، بالإضافة إني اشتغلت في الديجيتال ماركتينج، فاكتسبت معرفة كبيرة عن صناعة الاعلانات، وعرفت التعليق الصوتي وظيفته إيه في الإعلان، وبيتكتب إزاي وشاركت في كتابته، وليه بيتم اختيار صوت معين لإعلان معين، وليه الموضوع بيوصل إن بيختار سن المعلق الصوتي ونوعه ونبرة صوته وكل الحاجات إللي هي قوية ومؤثرة جدًا في نجاح الإعلان. وعلى جانب تاني، عرفت إنتاج الاعلانات سواء الأوف لاين ( التليفزيون والراديو) أو الاون لاين ( سوشيال ميديا) بيتم إزاي، لحد السعر وتفاوته، وطبعًا قررت اكتسب مهارات تفهمني أكتر أنا بعمل إيه، فا تعلمت الميكساج والمونتاج..إلخ

 

السيرة الذاتية بتاعتك هي نماذجك الصوتية

في الوقت الحالي، اؤكد لك إن محدش هيختارك علشان أنت ادرّبت في المكان الفلاني، أو معاك شهادة معينة، الحاجه الوحيدة إللي هيتم اختيارك علشان تعمل شغل هي نماذجك الصوتية. يمكن زمان كانت بتفرّق، لكن دلوقت لإن الأصوات كتير جدًا، فا التميز كله في صوتك.

إلا لو حد قوي في أي من المجالات اللي بتحتاج مُعلق صوتي له علاقة وطيدة بيك قدملك دعم، مش عيب إطلاقًا، لأن دي فرصة، وأنت محتاج للظهور لو فعلًا موهوب.

يبقى أنت المفروض تقدم نماذج صوتية، أو سامبلز، في التخصص والنوع اللي اختارته من التعليق الصوتي، للشركات والعملاء المحتملين.

ونركز شوية في النقطة دي، وإحنا بنعمل النماذج الصوتية.

-استخدم محتوى موجود واتعمل، لأنه مر بمراحل كتير علشان يتوافق عليه.

-السامبل غير الرسمي مش عيب ولا وصمة في حقك. اصنع نماذج غير رسمية علشان تظهر صوتك.

-إلعب على نقاط قوتك. شاطر في لغة غير اللغة العربية، دوّر على نماذج منها وسجلها، شاطر في اللغة العربية سجل باللغة العربية، العامية المصرية، لهجات خليجية.

-تكمله لنقاط القوة، من ضمن نقاط القوة خطة صوتك، صوتك اعلاني، ركز في الاعلانات، بتحكي كويس
(Storytelling)

اعمل نموذج فيه.. وهكذا

-اعمل نماذج محترفين: يعني ايه احتراف؟ يعني كسب الرزق المادي من فن وموهبة بعينها، فمع احترامي للشعر والشعراء، ده مش نموذج يُقدم لعميل لو قررت تسجل شعر!! إلقاء الشعر شيء جميل ولكن لا يُعد نموذج محترف!

-اختار محتوى تحس إنه ميتقالش إلا بصوتك، خصوصًا في الاعلانات. في الاعلانات بيتم اختيار الصوت بما يناسب عُمر ونوع والفئة الاجتماعية والمادية للجمهور، فا أنت بصوتك لازم تكون من ضمن الجمهور....

-اخيرًا، قدّم للعميل نوع التعليق والأداء اللي بيدور عليه، لأن ده بيزود فرصتك للحصول على العمل.

 

اتمنى إني أكون قدرّت أوصل معلومة مهمة جدًا لكل حد حاسس بإنه تايه ومش عارف يبدأ من جواه إزاي. حاجه أخيرة عايزة أقولها، لو عندك موهبة، وحاسس بشغفك ناحية فن التعليق الصوتي، ثق في نفسك، لأن عدم الثقة ضيعت مواهب كتير.

ابعتولي لو عايزني أتكلم عن حاجه بعينها، واشوفكم على خير في المقال الجديد.